Exo 34 | MEU | STEP | Iehova ese Mose e haduaia, Huro-nadidia palakadia rua ma bavabi, gunadia heḡereḡeredia; bena revarevadia ma baina tore, gunadia ruaosi, o hamakohidia ḡaudia, revarevadia na tore heḡereḡerena.

Exodus 34

Taravatu Nadidia

1 Iehova ese Mose e haduaia, Huro-nadidia palakadia rua ma bavabi, gunadia heḡereḡeredia; bena revarevadia ma baina tore, gunadia ruaosi, o hamakohidia ḡaudia, revarevadia na tore heḡereḡerena. 2 Daba ai ba heḡaeḡae, Sinai ororona ai ba dara dae, lau vairagu ai ba gini, ororo dorina ai. 3 Tau ta basine bamomu, bona tau ta basine hedinarai ororo dorina ai; bona mamoe seridia bona boromakau seridia basie aniani ororo badi-tanona ai. 4 Taunabunai, Mose na huro-nadidia palakadia rua e utudia, gunadia heḡereḡeredia. Bena daba ai e tore isi, ororo ai e dara dae, Iehova ena hahedua heḡereḡerena; hari nadi palakadia na imana ai e abi kau. 5 Bena Iehova na ori ai e diho, Mose badibadinai e gini, e helada hato. 6 Bena Iehova ese e rakaia hanai, eto, Lau binai Iehova; Iehova, hebogahisi bona harihari-bada Diravana. Badu ai na halahemu; hebogahisi ai bona uraheni ai na haraḡamu. 7 Daha daha na bogadia hisimu; kara-havara bona kara rea bona kara-dika na gwau taomu. Ḡau tamona, kerere taudia basina kahudia nege, a tamadia edia kara dika davadia na natudia baina henidia, bona tubudia baina henidia, ela uru ihatoina bona ihahanina danu. 8 Bena Mose na tano ai e goru diho haraḡa, e toma henia diho, 9 eto, Ḡaubada e, boma lalo namo henigu, mani emu kara, ai, lalo-auka besena taumai, bogaragimai ai baola, emai kara-havara bona emai kara-dika ba gwau tao, bona dihimu ai ba halaomai.

10 Iehova eto, A kamonai, aita herohemaino. Emu orea taudia iboudiai vairadiai hoa karadia baina kara, tanobada idoinai bese idau-idau bogaragidiai asie hedinaraiva karadia; bogaragidiai o nohomu oreadia iboudiai na Iehova ena kara bae itaia, badina be daimui ai baina kara karadia na mai garidia. 11 Hari dina ai baina henimui haheḡanidia vada ba badinadia. A itaia, lau na Amoro taudia bona Kanaan taudia bona Hiti taudia bona Perisi taudia bona Hivi taudia bona Iebusu taudia na umui vairamui ai baina luludia lasi. 12 A ba heita, ba lao henia tanona taudia ida basio herohemaino, ba hekwakwanai na garina. 13 Edia ihaboulaina patadia ba ḡiḡi rohoroho; edia kaivakuku ba hamakohidia; edia dubu ba tara patapata; 14 badina be umui ese idau dirava ta basio toma henia diho, badina be Iehova ladana ta be Vaḡeḡe: ia be vaḡeḡe Diravana. 15 Taunabunai ba heita, una tano taudia ida basio herohemaino; edia dirava basio toma henidia diho; edia boubou karadia basio kara; edia ihaboulaina ḡaudia basio ani. 16 Natudia hahinedia danu basio abidia, natumui mamaruanedia basie adavadia; unu hahine ese edia dirava bae toma henidia diho negadia ai na unui natumui ese danu bae toma henidia diho na garina. 17 Kaivakuku danu basio kara.

18 Flaoa asie hatubua Ariana ba badinaia. Dina hitu asie hatubua flaoana mo bavania, vada na haḡanimui heḡereḡerena, nega korikorina ai, hua ladana Abib ai, badina be Abib huana ai umui na Aigupto amo o raka lasi. 19 Roboa mamaruanedia iboudiai na lauegu: boromakau natudia roboa mamarunedia bona mamoe natudia roboa mamaruanedia. 20 Doniki natuna roboana davana na mamoe natuna ta ba henigu; a davana basioma karaia, aiona boma hakwaidua. Umui natumui roboa mamaruanedia danu davadia ba kara. Asi tauna ta ima kavakava ai baine hedinarai lau vairagu ai.

21 Dina tauratoi ba ḡaukara, a dina ihahituna ai laḡamui bavani; tano iruana negana ai bona taboro negana ai danu ba laḡa ani. 22 Pura ariana ba karaia, uit iutuna ba matamaia negana ai; bona laḡani dokona ariana ba karaia, uma anidia ba habou vaitani negana ai. 23 Laḡani ta lalonai emui maruane iboudiai na nega toi Ḡaubada Iehova, Israel Diravana, vairanai bae hedinarai. 24 Badina be lau na bese idau-idau baina luludia lasi umui vairamui ai, bona emui tano hetoadia baina habada; asi tauna ta ese danu emui tano baine hekise-hekise henia, umui na laḡani ta ta amo nega toi toi Iehova emui Dirava vairanai ba dara dae bona ba toma henia diho negadia ai.

25 Egu ihaboulaina rarana na flaoa ihatubuna muramurana ida basio bulodia. Lagau-hanai Ariana bahuna na basine mia rani. 26 Emui mua anidia roboadia na Iehova emui Dirava ena ruma ba laohai, boubou ḡaudia ai baela. Nani natuna na sinana ratana ai basio nadua.

27 Iehova ese Mose e hamaoroa, eto, Ini hereva ba tore, badina be ini hereva amo lau na oi bona Israel taudia ida vada tame herohemaino. 28 Dina hari-ahui boi hari-ahui ia na Iehova ida e nohova unuseni ai, aniani se ania bona ranu se inua. Una negana ai ia ese hari herohemaino herevadia na huro-nadidia palakadia ai e tore: taravatu gwautaosi.

29 Mose na Sinai ororona amo e hekei diho, mai taravatu nadidia ruaosi, imana ai e kadidiha. Una negana ai ia na se diba vairana vada e hururu-hururu, Dirava ida e hereva hereva dainai. 30 A Aaron bona Israel taudia iboudiai ese Mose e itaia, vairana e hururu-hururuva, bena iraka-kahi-henina e gari. 31 A Mose ese e boiridia, bena Aaron bona hebou igunalaina taudia e raka henia kahi; bena Mose ese e hereva henidia. 32 Gabeai Israel taudia iboudiai ese e raka henia kahi; bena Iehova ese Sinai ororona ai e henia haheḡanidia iboudiai na Mose ese e gwaurai henidia. 33 Ena hereva e hadokoa, bena vairana na dabua amo e ḡovaia ahu. 34 A Iehova ihereva-henina totona e raka vareai negadia ai, Mose ese dabua na vairana amo e kokia oho. Bena e raka lasi negadia ai, ia ese e kamonai haheḡanidia na Israel taudia e gwaurai henidia. 35 A Israel taudia na Mose vairana e itaia, kopina vada e hururu-hururu; taunabunai, mose na vvairana ma e ḡovaia ahu ela bona Iehova ihaere-henina totona e raka vareai lou.